Lokhu okuqukethwe akutholakali ngolimi lwakho olukhethiwe, yingakho sikwenze kwatholakala ngolimi oluseduze kakhulu olutholakala manje.

Amacebiso okuhlanza avela kuBabungazi asebemnkantsh'ubomvu

Indawo engenabala isiza ekugcineni izivakashi zijabule nasekutholeni ukuphawula okuhle.
Ngu Airbnb ngo- Mas 9, 2023
Ungakufunda imizuzu engu-2
Kulungiswe ngomhla ka- Mas 9, 2023

Indawo ehlanzekile ingaholela ekuphawuleni okuhle. Kodwa ukungahlanzeki kungesinye sezizathu ezihamba phambili zokuphawula okungekuhle, ngokwedatha ye-Airbnb. Zama lawa macebiso avela kuBabungazi asebenesikhathi ukuze ugcine indawo yakho ihlanzekile.

Ukwakha indlela yokuhlanza

Kungakhathaliseki ukuthi uhlanza ngokwakho noma uqasha abantu abahlanzayo, kubalulekile ukuthi indawo yakho ihlanzisiswe kahle ngemva kwesivakashi ngasinye, zikhathi zonke.

“Kubalulekile ukungayishintshi inqubo nokuba nezinhlu zezinto okumelwe zenziwe zabantu abahlanzayo,” kusho u-Juliette, oyilungu leBhodi Yabeluleki Bababungazi e-Nairobi, e-Kenya. “Kuyabasiza, ngoba kuba yinto abayenza ngokuphindaphindiwe. Ukunakekelwa kahle kwendlu kuyasebenza ngempela.”

Uma uqasha umuntu ohlanzayo, yenze yonke inqubo yokuhlanza ngokwakho, ukuze wazi kahle ukuthi yini okudingeka yenziwe nokuthi yini okufanele ifakwe ezinhlwini zezinto okumelwe zenziwe. Qiniseka ukuthi ushejula isikhathi esanele ngemva kokubhukha ngakunye ukuze ukwazi ukuhlanza kahle, bese uthola umuntu wesibili ohlanzayo noma ube nendlela eyibhekhaphu uma kwenzeka umuntu wakho ohlanzayo engaphumeleli ngelinye ilanga.

Ukuhlanzela izivakashi kudinga ukuba unake kakhudlwana kunalapho uzihlanzela wena. Cabangela ukubeka imali yokuhlanza kokukhuculula ngezikhathi ezithile ukuze wenze imisebenzi yasikhathi sonke yangemva kokubhukha ngakunye ibe lula.

Qala ngokusemqoka

U-Juliette ugcizelela ukubaluleka kokugxila ezindaweni ezithile lapho ehlanza.

  • Qala ngezindawo ezisetshenziswa kakhulu. “Ikhishi nezindlu zokugezela kubaluleke kakhulu, ngoba yizindawo ezisetshenziswa kakhulu,” kusho u-Juliette. Uma izindlu zokugezela sezihlanzekile, kuba yikhishi, lapho abantu bakhe abahlanzayo begeza khona zonke izitsha. Uthi, “Siyahlanzisisa.”
  • Okulandelayo: amakamelo okulala. Abantu baka-Juliette abahlanzayo bavula amadrowa, babheke ngaphansi kwemibhede, futhi baqinisekise ukuthi akukho okusele. Uthi, “Sibe sesihlubula imibhede, sivule kungene umoya endlini, sivule amafasitela gengelezi, sifake izinto zemibhede emanzini.”
  • Okokugcina, silungisa imibhede. Inqubo ka-Juliette? Uthi, “Omatilasi banama-protector, imiqamelo inama-protector, ngakho siyishintsha yonke isethi.”

Ukunaka izinto ezincane

Cabanga njengesivakashi. Ngokwesibonelo, u-Tammi, uMbungazi e-Seattle, uthi: “Ikhethini leshawa livame ukulibaleka. Nginelikapulasitiki, futhi ngilifutha ngesifutho ngilisule ngemva kwesivakashi ngasinye. Ngiphinde ngilishintshe njalo ngemva kwenyanga eyodwa noma ezimbili.”

Ngokufanayo, ungakhohlwa izindawo ezithintwa kakhulu njengezinkinobho zezibani. “Lezo zinto zingangcola ngempela, kodwa awuziboni ngoba uzijwayele,” kusho uMbungazi u-Adam wase-Atlanta. “Ukuhlikihla kancane nge-alcohol kuyawenza umehluko.”

Ukugwema ukushiya izinwele

Izivakashi azifuni neze ukuthola izinwele zomunye umuntu endaweni yazo. USue noJohn, aBabungazi e-Salt Lake City, banikeza icebiso lokuxazulula inkinga yokusala kwezinwele. Bathi: “Ngemva kokuwasha zonke izinto zemibhede, ngithatha i-lint roller ngisuse uboya emashidini, emiqamelweni, nasezingutsheni zokulala.”

U-Laura, uMbungazi e-Cottonwood, e-Arizona, usikisela okuhlukile kunemophu. Uthi, “Hlanza phansi endlini yokugezela ngezandla uguqe phansi,” usebenzisa ibhulashi noma indwangu ye-microfiber. “Kuyashesha futhi kulula, futhi azikho izinwele ezizosala.” Futhi khumbula ukuhlanza amadreyini asezindlini zokugezela ngemva kwesivakashi ngasinye.

Ukuzama amacebiso abanye aBabungazi

Nanka amacebiso okuhlanza avela kuBabungazi asebemnkantsh'ubomvu:

  • Faka izinto emshinini wokuwasha kuqala. “Okokuqala engikwenzayo ukuthatha wonke amalineni emibhede namathawula ngiwajikijele emshinini wokuwasha, umshini ube uwasha ngesikhathi ngihlanza kwezinye izindawo,” kusho u-Emma-Kate e-San Francisco. “Kuba lula.”
  • Pholisha izindawo eziwukhuni phansi. “Indawo yami phansi iwukhuni. Ngiyipholisha njalo ukuze uma izivakashi zingena zibone ukuthi kuyacwebezela phansi,” kusho u-Tammi e-Seattle. “Kwenza ziqiniseke ukuthi zisendaweni ehlanzekile.”
  • Goqa ithishu yasendlini yokugezela. “Ngigoqa iphethelo lephepha lasethoyilethi,” kusho u-Emma-Kate. “Kuyinto encane, kodwa kubonakala kuhlanzekile futhi kuyabonisa ukuthi uyanaka.”
  • Gcwalisa amabhodlela ensipho yezandla ne-shampoo. “Kuhle ukuba nezinto eziyisidingo zasendlini yokugezela ezibonakala zizintsha,” kusho u-Alex e-San Francisco. “Ibhodlela eligcwele elivaliwe lenza isivakashi sizizwe singumuntu wokuqala olisebenzisayo.”
Imininingwane ekulesi sihloko kungenzeka isishintshile selokhu sashicilelwa.
Airbnb
Mas 9, 2023
Ingabe lokhu kube wusizo?