Thola ukuphawula okwengeziwe kwezinkanyezi ezingu-5

Ababungazi Abavelele, osomabhizinisi, namadizayina angaphakathi endlini u-Catherine no-Bryan Williamson be-Beginning in the Middle bakhe ibhizinisi lokusungula izindawo zokuhlala zezinkanyezi ezingu-5. Njengoba sebebungaze izivakashi ezingaphezu kuka-2,000, bazosixoxela ngendaba yabo namacebiso abo obuciko nendlela yokwenza ikhaya lakho likhumbuleke.

U-Catherine: “Kithina, ukuqalisa ibhizinisi lethu le-Airbnb nemboni yokudizayina kwaba ingozi enhle esawela kuyo. Ngo-2013, sathutha e-New York City saya e-Columbus, Ohio—okuyindawo u-Bryan akhulela khona. Sasifuna indawo enkudlwana, futhi sifuna indawo esasingahlala kuyo futhi sizisungulele okuthile.”

U-Bryan: “Sathenga indlu enamakamelo amathathu—futhi sazithola sesidinga ukukhokhela isikweletu esasisele. Kodwa asiwuthandanga umbono wokuhlala nomunye umuntu.”

U-Catherine: “Omunye wabangane bethu wayenomuntu amaziyo owayeqashisa ngekamelo lakhe angalisebenzisi ku-Airbnb futhi wasikisela ukuthi sikuzame. Ngaleso sikhathi, sasingazi nokuthi yini i-Airbnb. Sino-Bryan sacabanga: ‘Kulungile, uma nje singabhukha ubusuku obungu-10 kulo nyaka, lokho kungaba kuhle kakhulu…’”

U-Bryan: “Sayifaka, futhi baba baningi ababeyifuna. Ngokushesha ngemva kwalokho, sathuthukela ekubungazeni indlu yonke. Sasihlola futhi sihlala ema-motel ahlukahlukene kuyo yonke i-Columbus saze sathola eyayingeyimbi kangako. Kwaze kwafika ezingeni lapho sasihlala khona amaviki athile ngesikhathi. Sasizazi zonke izisebenzi zasehhotela. Kodwa lokho kwakunganele.”

U-Catherine: “Sakhokha saze sasiqeda isikweletu sethu futhi ekugcineni sathenga enye indlu. Ngemva kweminyaka embalwa, sadayisa izindlu ezimbalwa sagcina lezo esizithandayo ku-Airbnb. Sayeka imisebenzi, sasungula istudiyo sokudizayina ngaphakathi endlini esithi (Mix Design Collective), ibhrendi yethu yokuqashisa ukuvakasha ethi (The Village Host), futhi saqalisa ibhulogi yethu ethi (Beginning in the Middle).”

U-Bryan: “Esikukhathalela ngempela ukusungula okokuzithokozisa okukhethekile kwazo zonke izivakashi. Futhi lolo thando lokwamukela izivakashi lusenze sasungula ukuphila esikuthanda ngempela. Njengombungazi, kungakhathaliseki ukuthi unezindlu ezisezingeni eliphezulu, uma unganikeza ukuhlala okuphawulekayo, uzobona izilinganiso zakho zokuphawula nokuhlala zikhuphuka.”

U-Catherine: “Enye yezimfihlo zokuthola ukuphawula kwezinkanyezi ezingu-5 ukutshela izivakashi lokho ezingakulindela ngaphambi kokuba zichofoze inkinobho ethi Bhukha. Izindlu zethu zindala, futhi senze okuningi ukuze sizenze zithokomale, zibe zinhle. Kodwa zinazo izici zazo, ngakho sizama ukunikeza imininingwane eminingi ngangokunokwenzeka kusengaphambili. Ngokwesibonelo, kunemisindo phansi lapho uhamba naseminyango.”

U-Bryan: “Amagumbi ethu okugezela mancane. Enye yamayunithi ethu inodonga eluhlanganyela nomakhelwane. Siyakuveza lokho ukuze abantu babonise ukucabangela futhi bangabangi umsindo. Amaphathi AKUFANELE abe khona.”

U-Catherine: “Sinobhavu wakudala onemilenze othe ukuphakama kunobhavu ovamile—uma kuwukuthi izivakashi zinezidingo ezikhethekile. Abanye abantu zingase zibaphazamise lezi zici. Abanye abantu bangase bangabi nandaba—kodwa sizama ukukhuluma nomuntu esaziyo ukuthi uzokujabulela ukuba sendaweni nasendlini.”

U-Bryan: “Ukuxhumana nezivakashi ngokushesha nangokucacile kuyingxenye ebalulekile yokokuzithokozisa kwezinkanyezi ezingu-5. Kuyasiza ekuboniseni izivakashi zakho ukuthi uyaqhubeka uzinakekela.”

U-Catherine: “Abantu bahlala nawe kuphela okwesikhathi esithile esifushane—futhi ngokuvamile basuke bevakashele into ebalulekile—ngakho awufuni umuntu ahlale isikhathi esithile elinde impendulo evela kuwe noma elinde ukuba ulungise okuthile. Ngiwuhlobo lomuntu olusabela phakathi nemizuzu emihlanu, kodwa uma ucabanga ukuthi ngeke ukwazi ukuphendula abantu ngokushesha, cabangela ukuba nombungazi ongumsizi ukuze akusize ngama-imeyili nemiyalezo. Senza konke esingakwenza ukuze sibabonise ukuthi bazoluthola usizo nokuthi siyabakhathalela. Futhi ngezinye izikhathi lokho kusho ukuyeka lokho okwenzayo ukuze ukuvakasha kwabo kube okwezinkanyezi ezingu-5.”

Funda ngokusebenza nombungazi ongumsizi

U-Catherine: “Uma kuziwa ekuhlobiseni nasekuvulekeni kwendawo, into ebaluleke kakhulu ukuthi izivakashi zizizwe sengathi yindawo yazo uma zilapho. Ziphe isikhathi futhi uzame ukuhlobisa ngefenisha ehlukile—ubeke kahle izinto futhi ulungise kahle.”

U-Bryan: “Futhi lokho akusho ukuthi kudingeka uqale phansi wakhe kabusha ikhishi lonke ngemabula, noma ufake izinto ezibizayo zodwa. Ngicabanga ukuthi okubaluleke kakhulu ukuthi kuhlanzeke, kuthokomale, futhi kucoceke.”

U-Catherine: “Kufanele zizizwe sengathi indawo ilungiselelwe zona ngokukhethekile. Ziphe isikhathi sokususa izithombe zakho, izikhumbuzo zomndeni, imihlobiso engathi shu, izinto ezingadingeki, nanoma yini engenza izivakashi zizwe ukuthi zisendlini yomunye umuntu.”

U-Bryan: “Enye yezinto ezibalulekile ongayithenga umbhede okahle. Futhi, akudingeki kube umatilasi obizayo, kodwa sizofaka i-topper kanye nezinhlobo ezimbili zemiqamelo: ongakukhetha esikhundleni se-down ne-down alternative.”

U-Catherine: “Emashidini, sivame ukufaka okungenani u-300-thread, okuyilokho amahhotela amaningi akusebenzisayo. Kufanele abe bushelelezi esikhunjeni futhi angahwayi—ngoba abantu basuke bebhukha indawo yakho ukuze balale khona. Futhi njengoba sazi—ikakhulukazi njengabazali—ukuphumula kahle ebusuku kuyafiseleka.”

U-Catherine: “Uma abantu bezohlala nawe, khumbula ukuthi awubanikezi nje indawo yokuhlala kuphela, kodwa ubavumela ukuba bajabulele ukuba sedolobheni lakini. Siyathanda ukuzama ukubanikeza imibono yethu ngalokho abangakujabulela uma kungenzeka. Amabhizinisi amancane ayingxenye enkulu yokuphila kwethu e-Columbus—ngakho siyakujabulela ukuhilela wonke umuntu.”

U-Bryan: “Ngezinye izikhathi sishiyela izivakashi isampula elincane lezinto zendawo esizithandayo: amakhadi esipho ekhofi lendawo azozikhuthaza ukuba zihambahambe endaweni. Siba nesitokwe se-shampoo, i-conditioner, nensipho yokugeza ubuso kwenkampane yendawo ebizwa ngokuthi yi-Cliff Original. Sinensipho yezandla yebhrendi ebizwa ngokuthi yi-Glenn Avenue. Sinesethi yezincwadi ezithi The Columbus Book Project, eziye zenziwa usomabhizinisi wendawo eziqokomisa amaciko endawo. I-Columbus iyidolobha elingadumile, kodwa yindawo ekahle kakhulu ongahlala kuyo, ukhulele kuyo, uyivakashele—futhi inezinto eziningi ongazijabulela.”

U-Catherine: “Siyakuthanda ukubonisa abantu indawo yase-Columbus—futhi kuyasijabulisa ukuthi singakwazi ukusungula okokuzithokozisa okwenza abantu bathi, ‘Ngingathanda ukuthuthela e-Columbus.’”

U-Bryan: “Omunye umbono esicabangela ukuwuletha emphakathini wase-Columbus ukusebenzisa amakhaya ethu njengegalari yobuciko noma ikilabhu yakusihlwa ukuze sikhangise ngabaculi basendaweni okungenzeka bebengeke bakwazi ukuveza amakhono abo. Sifuna ukukhangisa ngezithombe ezimbalwa endlini ngayinye bese sizishintsha ngezinye njalo ngemva kwezinyanga ezimbalwa. Yiba yiciko futhi ucabange izindlela zokuba indlu yakho ibonise ubuhle basendaweni.”

U-Bryan: “Naphezu kwezifiso nemizamo yakho emihle yokusungula okokuzithokozisa kwezinkanyezi ezingu-5, yazi ukuthi kuzovela izimo eziphuthumayo, futhi kuzodingeka uzixazulule—kungakhathaliseki ukuthi yi-air conditioner ephukile noma izivakashi ezinganelisekile. Esinye sezimo ezimbi kakhulu esaba nazo kwaba ukuqhuma kwepayipi. Indlu yagcwala amanzi phakathi nesikhathi sokuhlala kwezivakashi. Zazilokhu zisibiza…”

U-Catherine: “… Kodwa ucingo lwami lwaluvaliwe.”

U-Bryan: “… Kwakuwubusuku bomshado wazo.”

U-Catherine: “Kwakukubi ngempela. Kwakuyindlela enkulu yokuba sifunde. Uma kwenzeka lezo zinto, xolisa bese usebenzisa ukwahlulela kwakho okuhle ekuboneni ukuthi kufanele banxeshezelwe yini noma isipho esinjengamakhekhe, ibhodlela lewayini, noma isipho sokudla kwakusihlwa singaba usizo. Uma izivakashi ziba nesikhathi esingajabulisi, sizibuyisela imali, kodwa akuvamile ukwenzeka lokho.”

U-Bryan: “Sizama ukusebenzisa umthetho wegolide ngokunika izivakashi zethu lokho ebesingafisa ukukuthola ukube besihlala endaweni yethu. Ukubungaza sikubheka njengendlela yokubonisa ubuciko. Sasizithanda lezi zindawo futhi sabonisa umhlaba wonke ukuze abantu bakwazi ukuzijabulela. Kusho lukhulu kithi ukuzwa amazwi okubonga ezivakashi zethu.”

U-Catherine: “Ukuthola ukuphawula kwezinkanyezi ezingu-5 kuyisigxivizo sakho konke esikwenzayo. Uma silungisa indlu, uthemba ukuthi kunothile ozokujabulela ukuzikhandla okwenzayo. Futhi ngicabanga ukuthi uma ugxile ngokukhethekile emananini otshalomali lwesakhiwo, kuba lula ukuchitha okunye kwalokhu kulungisa.”

U-Bryan: “Ukubungaza akulula. Kungumsebenzi omkhulu.”

U-Catherine: “Kodwa kuningi esikuzuzile futhi kuye kwashintsha ukuphila kwethu. Kusivumele ukuba senze into esiyithandayo ngokudizayina ngaphakathi kwezindlu futhi saqala ukubungaza izivakashi. Kusinikeze ithuba lokuqala ibhizinisi lethu futhi siqhubeke sikhula. Ngicabanga ukuthi ukube bekungengenxa ye-Airbnb, kwakuyoba nzima kakhudlwana ukufunda ngokuba nebhizinisi elincane nokuqalisa elethu. Kusisize sabona into esiyithandayo, ukuthi siyakuthanda ngempela ukulungisa izindlu ukuze zihlale abanye abantu.”

U-Bryan: “Siye sakwazi ukuveza amakhono esinawo ebhizinisi futhi sasebenzisa nobuciko bethu. Okuhle kunakho konke ukukwazi ukwenza okuthile okuthandayo—nokukwazi ukuzenzela wena.”

U-Catherine: “Sithemba ukuthi la macebiso azokusiza uthole ukuphawula okwengeziwe kwezinkanyezi ezingu-5.”

Ukujabulele ukubungaza!
U-Catherine, u-Bryan no-Bianca