Umhlahlandlela wabaqalayo wokubungaza okulondolozekayo

Ukuba uMbungazi ongayilimazi imvelo akulungeli umhlaba kuphela, kulungela nebhizinisi lakho lokubungaza. Ngo-2019, inani lokuhlala emakhayeni avikela imvelo lenyuka ngamaphesenti angu-141* kunangonyaka owawandulele.

Ukuze sikusize ube uMbungazi ovikela imvelo, sesisebenze ngokuseduze ne-United Nations Environment Programme, igunya eliphambili emhlabeni wonke ku-United Nations, kanye ne-World Wildlife Fund, inhlangano ehamba phambili emhlabeni yokulondoloza imvelo, ukuze sithole imibono yochwepheshe. Siphinde sathola iseluleko esivela kuBabungazi emhlabeni jikelele abathathe izinyathelo ezilula kodwa ezinegalelo ukuze benze umehluko.

Funda ukuze uthole ukuthi ungasungula kanjani ukuhlala okuvikela imvelo kakhudlwana ezivakashini zakho.

Ukwenza indawo yakho isebenzise ugesi ngendlela eyonga kakhudlwana kunganciphisa inani lezinsiza ozisebenzisayo, kunciphise izindleko zakho, futhi unciphise izinga lokoniwa kwemvelo. Nanka amasu wokonga ugesi:

• Khumbuza izivakashi ukuba zikhiphe amadivayisi emapulakini uma zingawasebenzisi: Ugesi ongaba ngu-50%** osetshenziswa omakhalekhukhwini uvela kumashaja axhunyiwe kuyilapho engasetshenziswa.
• Lungisa igiza yakho: Nakuba izinga lokushisa elivamile legiza yamanzi lingu-60 degrees Celsius, ukulinciphisa libe ngu-48-54 degrees Celsius kungasiza ekongeni ugesi.
• Hlola amagilobhu akho: Ukusebenzisa ama-watt aphansi ngangokunokwenzeka kungakhiqiza ukushisa okuncane futhi kunciphise ukusebenzisa kwakho ugesi ngokuhamba kwesikhathi. Amagilobhu onga ugesi, njenge-CFL ne-LED, nawo asebenzisa ugesi omncane futhi ahlala isikhathi eside** kunalawo agqamile.
• Vikela indawo yakho esimweni sezulu: Faka izinto zokuvikela emnyango futhi emafasiteleni ufake izinto ezibamba ukushisa uma kubanda nezibamba umoya opholile ehlobo ukuze wonge izindleko zokushisisa nokupholisa.
• Thenga ama-thermostat esimanje anezilawuli ezisebenza ngokuzenzakalelayo: Ama-thermostat e-wifi angakuvumela ukuba ulawule izinga lokushisa kuye ngokufika nokuhamba kwezivakashi. 
• Hlaziya izinto zakho zikagesi: Uma sekuyisikhathi sokuthenga izinto zikagesi ezintsha, khetha lezo ezinamareyithingi aphezulu okonga ugesi.

Izinto zokuhlanza ezisebenziseka kabusha nemikhiqizo egcwaliswa kabusha iyithuba elihle kubantu abaningi lokunciphisa ukoniwa kwemvelo. Cabangela la macebiso okuvikela imvelo:

• Shintsha izinto zokuhlanza ezisetshenziswa kanye vo: Umbungazi ovelele u-Anna wasePembrokeshire, eWales, uthenga izipontshi eziwashwayo nezisebenziseka kabusha kanye nezindwangu zokuhlanza ze-microfiber ekhishini esikhundleni samathawula ephepha alahlwayo.
• Sebenzisa imikhiqizo yephepha eligaywe kabusha: Kunoma yimiphi imikhiqizo yephepha oyihlinzekayo, njengethishu yobuso noma iphepha lasendlini encane, khetha iphepha eligaywe kabusha ngokuphelele ukuze uvikele imvelo kakhudlwana.
• Nciphisa amakhemikhali anobungozi: Thenga insipho yezitsha, insipho yokuwasha, nezinto zokugeza ezingenabo ubungozi, ezingokwemvelo, noma ezibola ngokwemvelo. EBordeaux, eFrance, uMbungazi Ovelele uPascale uthenga imikhiqizo yokugeza neyokunakekela umzimba eyenziwe ngezinto zemvelo ezitolo zasendaweni.
• Shintshela ezindwangwini ezenziwe ngezinto zemvelo: Uma sekuyisikhathi sokushintsha amashidi namathawula, ukukhetha izindwangu ezenziwe ngezinto zemvelo kungakusiza ugweme amakhemikhali wokubulala izinambuzane, izibulala-zinambuzane, nezinye izinto ezinobuthi ezilimaza abantu nezinto eziphilayo. 

Ngenxa yokuthi amanzi ahlanzekile ayisidingo esilinganiselwe, kubalulekile ukuthi uqaphele ukuthi wena nezivakashi zakho nisebenzisa amanzi angakanani, ikakhulukazi njengoba inkinga yokushintsha kwamazinga okushisa omhlaba wonke ibangela isomiso esengeziwe. Nazi ezinye izindlela eziwusizo zokonga amanzi:

• Shiyela izivakashi izikhumbuzo: Ukunciphisa isikhathi osichitha eshaweni kungonga amanzi angaphezu kwegalani** umzuzu ngamunye. Umbungazi ovelele u-Antonella eMilan, e-Italy, ubeka amanothi eduze kwezimpompi ukuze akhuthaze izivakashi ukuthi zivale amanzi lapho zixubha amazinyo. Ungakhuthaza futhi izivakashi ukuba zingagezi isikhathi eside.
• Hlola ukuvuza: Ukuhlola njalo izindawo ezizungeze amathoyilethi, osinki, obhavu, nezinto zikagesi ezisebenzisa amanzi kungakusiza uthole ukuvuza. Imitha yamanzi ingase ikwazi ukulandelela ukuthi usebenzisa amanzi angakanani futhi ikwazise uma kukhona okungavamile—ngokwesibonelo, uma ukhohlwa ukuvala impompi yasekhishini noma kukhona ukuvuza emshinini wokugeza izitsha.
• Sebenzisa amasethingi nemishini esebenza kahle: Imishini yokuwasha nemishini yokugeza izitsha isebenzisa amanzi amaningi. Uma indawo yakho inayo, khuthaza izivakashi ukuba zisebenzise amasethingi okuwasha okusheshayo noma okonga amanzi. Futhi uma sekuyisikhathi sokushintsha umshini, khetha owonga ugesi futhi osebenzisa amanzi angemaningi.
• Faka izinto ezonga amanzi: Ungenza umehluko ngokufaka izimpompi noma amathoyilethi onga amanzi. ETasmania, e-Australia, uMbungazi ovelele uMerrydith unekhanda leshawa elikhethekile elinciphisa ukuphuma kwamanzi kuyilapho uzwa amandla anele wokuphuma kwamanzi.

*Ngokusekelwe olwazini lwangaphakathi lwe-Airbnb lokwanda konyaka nonyaka ekufikeni kwezivakashi kokufakwe ku-Airbnb okuhlanganisa amagama ayinhloko athile (okungayilimazi imvelo, njll.) ezihlokweni nasezincazelweni zokufakwe ku-Airbnb kusukela ngo-August 2018 kuya ku-August 2019

**Kuvela ku-World Wildlife Fund's 60 Actions for the Planet, eshicilelwe ngo-March 5, 2021

Imininingwane ekulesi sihloko kungenzeka isishintshile selokhu sashicilelwa.