Thuthukisa izithombe zakho zendlu

Ubuwazi yini ukuthi izithombe zingesinye sezici eziyinhloko izivakashi ezinquma ngazo lapho zikhetha indawo yokuhlala? Ikhwalithi yezithombe zakho ingathinta nendlela labo abangaba yizivakashi abavame ngayo ukuthola indlu yakho emiphumeleni yokusesha—okusho ukuthi izithombe zekhwalithi ephakeme zibalulekile ebhizinisini lakho lokubungaza.

U-Jeff no-Candida bangabathwebuli bezithombe abangamaphrofeshinali naBabungazi Abavelele abasebenzisa ubuciko babo ukuze bathole ukubhukha okwengeziwe endaweni yabo esogwadule, i-El Rancho, e-Joshua Tree, e-California. Imfihlo yabo ukwenza indawo yabo ibukeke iyinhle ezithombeni njengoba injalo uma uyibona ngokoqobo.

Lapha, laba ababili banikeza amacebiso abo obuciko okuthuthukisa izithombe zendlu yakho.

Uma uthwebula indawo yakho, qiniseka ukuthi kucocekile. “Ngezinye izikhathi kuyasimangaza ukubona indlela abantu abaningi abakhohlwa ngayo ukucoca ezindlini zabo basuse izinto ezingenasidingo ngaphambi kokuthwebula izithombe,” kusho u-Jeff. “Sizama ukugcina amagumbi endlu yethu engenayo imfuhlumfuhlu, ukuze kube lula ukuthatha isithombe esisifunayo—ngaphandle kweziphazamiso.”

Noma kunjalo, lokho akusho ukuthi indawo yakho kufanele ingabi nalutho. “Faka into esetshenziswa umuntu esithombeni,” kusho u-Candida, njengengubo, noma isitaki esincane sezincwadi. “Kwenza indawo ifudumale nakakhulu.”

Isithombe sekhava yendlu yakho yinto yokuqala izivakashi eziyibonayo emiphumeleni yokusesha nasekhasini lendlu yakho, ngakho zama ukusenza sikhange.

“Cabanga ngalokho okwenza indlu yakho ihluke kwezinye. Yini eyenza ikhetheke? Ngabe ucabanga ukuthi abantu bazokwazi ukuzibona belapha? Hlola ezinye izindlu ze-Airbnb ukuze uthole ugqozi futhi ubone ukuthi yini esebenzayo,” kutusa u-Candida.

“Imfihlo yokuthwebula izithombe ezinhle ukukhanya,” kusho u-Candida. Nakhu ukusikisela okumbalwa kokuthwebula indawo yakho ngokukhanya okufanele:

• Bheka ukukhanya kwakho. Zama ukubona ukuthi ukukhanya kwelanga kubukeka kanjani ngaphakathi nangaphandle kwendlu yakho phakathi nalo lonke usuku.
  
• Thatha izithombe ekushoneni noma ekuphumeni kwelanga. Uma uthwebula ngaphandle, thwebula izithombe ngemva nje kokuphuma kwelanga noma ngaphambi kokuba lishone—amahora anombala wegolide. Ukukhanya akuhlabi, futhi kunikeza indlu yakho umbala omuhle, onemfudumalo.
  
• Thola ukukhanya okungokwemvelo. Uma uthwebula izithombe endlini, thola isikhathi sosuku lapho uthola khona ukukhanya okuningi okuqondile, kwemvelo. Eminye imithombo yokukhanya engeyona eyemvelo kumelwe isetshenziwe ekugcineni uma sekuhluleke konke, ngoba ivame ukweqisa ezithombeni.
• Cisha ifleshi. Njenganoma yikuphi okunye ukukhanya kokuzenzela, ukusebenzisa ifleshi kungasona isithombe. Uma indawo oyithwebulayo ingenakho ukukhanya kwemvelo, khanyisa isibani ukuze usungule umuzwa wokuthokomala.

Uma kuziwa kukhwalithi yesithombe, ukwakheka kwaso—izici ezinjengokuma kwaso, usayizi wesithombe, indlela okuhlelwa ngayo, nesimethri—kubaluleke ngezinga elifana nalokho okuthwebulayo esithombeni. Nanka amacebiso ongawacabangela uma uhlela ukwakheka kwesithombe:

• Okuthwebula esithombe makube maphakathi. Khumbula ukuthi i-Airbnb inciphisa izithombe ukuze zilingane kulokho okufakayo nasemiphumeleni yokusesha. Beka okuyinhloko okuthwebulayo maphakathi kufreyimu ukuze kungabi nalutho olubalulekile olusalayo. “Uma kunezinto ezikhethekile ozithandayo endlini yakho, zama ukuzibeka maphakathi esithombeni ukuze zibonakale,” kusho u-Jeff.

• Thwebula maqondana neso. Ukuthwebula isithombe sakho maqondana neso—ngaphandle kweziphazamiso, noma uphansi noma uphezulu—kusiza ekuqinisekiseni ukuthi isithombe siphuma kahle, futhi sivumela izivakashi zibone indawo njengokungathi ziyibona ngokoqobo.
• Hlukanisa isithombe kathathu. “Uma uhlukanisa ifreyimu yakho kathathu, ungayisebenzisa njengesiqondiso ekuhleleni izinto ekwakhekeni kwesithombe sakho,” kusho u-Jeff.
• Faka izithombe ezihlukahlukene. Izithombe ezibanzi zisiza abantu baqonde usayizi wegumbi, kuyilapho izithombe ezibuqamama zisiza ekugxileni ezintweni ezithile, njenge-TV noma ibhayisikili lokuzivocavoca. Izithombe ezinemininingwane zigcinele izici ezincane ezinikeza umbono wendawo yakho.
• Bonisa ukuhlobana. Cabanga ngegalari yezithombe zakho njengendlela yokubonisa ikhaya lakho, futhi ubonise labo abangaba yizivakashi indlela amagumbi ahlobana ngayo ezithombeni.

Uma ukhetha ukuthi uzothwebulani—nokuthi yini ongeke uyithwebule—zama ukucabanga njengesivakashi.

“Kubalulekile ukuhlela izithombe futhi ukhethe ezimbalwa eziyibonisa kahle indlu yakho,” kusho u-Candida. “Yini izivakashi zakho ezizoyithanda ngale ndawo? Yiziphi izinto ezingalindelekile okungadingeka bazazi? Ungayibonisa kanjani imininingwane kodwa unikeze nombono ophelele wokuthi igumbi libukeka kanjani?”

Khumbula ukuthi ingxenye yokukhangisa ngendlu yakho iwukuqhelisa ilensi bese ubonisa indawo ezungezile. “Akuzona zonke izithombe okudingeka zibe nekhaya lakho,” kusho u-Jeff. Ungafaka izithombe zomzila oseduze wokuhamba ezintabeni, ngokwesibonelo, noma isitolo esihle sekhofi ekhoneni.

Ngaphezu kwakho konke, njengoba wabelana ngendawo yakho nendawo eyizungezile, sebenzisa izithombe zekhwalithi ephezulu ukuze izivakashi ezingase zibhukhe zikubone ngeso lengqondo ukuhlala kwazo—futhi, uma kungenzeka, zibhukhe indawo yakho zijabulele ukuhlala ezingeke zikukhohlwe.

Imininingwane equkethwe kulesi sihloko kungenzeka isishintshile kusukela sashicilelwa.