Indlela yokusingatha ukuphawula okubi

Ukuphawula okubi kungalimaza, kodwa ngisho nababungazi abasezingeni eliphakeme bayakuthola ngezikhathi ezithile. Nawa amacebiso ambalwa okusingatha umbiko wezivakashi ongemuhle.

Ukushiya impendulo esidlangalaleni kusiza ekuboniseni izivakashi ukuthi uyakwamukela ukusikisela. Impendulo emfushane, enobungane ingasiza ekuqinisekiseni ezinye izivakashi ngokuthi uyakukhathalela okokuzithokozisa kwazo.

“Angilindele kunoma yimuphi umbungazi ukuba abe nokuphawula okungenaso nhlobo isici,” kusho u-Andrew, isivakashi esiphinde sibe uMbungazi Ovelele eBerlin. “Ngikhangwa kakhulu yilabo abangawubukeli phansi umbiko ogxekayo.”

Cabangela lawa macebiso okuphendula ekuphawuleni okubi:

• Bonga izivakashi ngombiko wazo. Lokhu kungaba lula njengokuthi: “Siyabonga ngokuphawula kwakho. Siyakwazisa ngempela ukuthi uziphe isikhathi sokucabanga ngohambo lwakho.”
• Yabelana ngendlela oyithuthukisa ngayo indawo yakho. Ungase ubhale: “Siyaxolisa ngokuthi imibhede ibingekho ntofontofo. Ukulala kwakho kubalulekile, ngakho-ke sifake ama-mattress topper.”

Ungakwazi ukucela ukususwa kwanoma yikuphi ukuphawula okutholayo okholelwa ukuthi akulandeli Inqubomgomo Yokuphawula, njengokuphawula kokuziphindiselela.

Izinkinga zokunemba nenhlanzeko yizizathu ezimbili ezivame kakhulu ezenza izivakashi zinikeze ababungazi izinkanyezi ezingaphansi kwezinhlanu. Sebenzisa umbiko wezivakashi njengethuba lokuthuthukisa ukubungaza kwakho.

Nazi izindlela ezimbalwa zokubonisa izivakashi ukuthi uhlale ukulungele ukuthuthukisa:

• Phatha umbiko njengethuba. Izivakashi zinikeza imibono okungenzeka ubungakaze uyicabange, njengokuthi ungenza ukungena kube lula noma ufake amathawula engeziwe.

• Ungafihli lutho. Gcina izithombe zakho nencazelo yalokho okufakile ku-Airbnb kungokwakamuva ukuze ubonise lokho okunikezayo njengamanje. Chaza ukuthi uzisingatha kanjani izinkinga ezingase zibe khona, njengokuhlinzeka ngama-earplug uma umgwaqo wakho unomsindo.

• Zijwayeze ukubungaza okungabandlululi. Gxila ekwenzeni zonke izivakashi zizizwe zamukelekile ngokusebenzisa ulimi olungathathi hlangothi ngokobulili nangokugqamisa izici zabanokukhubazeka.
• Xhumana nezivakashi phakathi nokuhlala kwazo. Sebenzisa imiyalezo eshejuliwe ukuze ubuze ukuthi izinto zihamba kanjani, futhi ngokushesha uxazulule noma yikuphi ukukhathazeka.

Imininingwane ekulesi sihloko kungenzeka isishintshile selokhu sashicilelwa.