Ukusiza ngokuphuthumayo enhlekeleleni yase-Ukraine

Evikini elingemva kokuhlasela kwe-Russia e-Ukraine, iciko noMbungazi u-Rafał wayizwa imiphumela yako edolobheni lakubo e-Wroclaw, eningizimu-ntshonalanga ye-Poland. Kwapakiswa amabhokisi ezinto eziyisidingo ezinikelwe ngaphandle kwesikhungo sase-Ukraine sezomdabu edolobheni lakubo. Wezwa kukhulunywa isi-Ukraine emigwaqweni nasezitolo.

Masinyane imindeni emithathu evela e-Ukraine yayisibhukhe ukuhlala kwenyanga, ngokulandelana, endlini ayifake ku-Airbnb. Ekhathazeke ngokukhokhisa abantu ababalekela impi, u-Rafał wathintana nesevisi yamakhasimende ye-Airbnb, wathola ukuthi i-Airbnb.org ingamxhasa emizamweni yakhe, futhi wabhalisa.

Ngokwe-U.N. Human Rights Council, cishe abantu abayizigidi ezingu-7 babaleka e-Ukraine ezinyangeni eziyisithupha ngemva kokuhlasela kwango-February 2022. Izigidi zemindeni zafika emadolobheni akulo lonke elase-Europe ngamasudikesi ambalwa futhi zingazi nakwazi ukuthi zizophindela nini emakhaya.

Isabela kulobu bunzima, i-Airbnb.org yakhipha isicelo esiya kuzo zonke izinhlangano ezingophathina bayo ezingenzi inzuzo nomphakathi womhlaba wonke waBabungazi: Ningasisiza yini sinikeze abantu abangaba ngu-100,000 ababaleka e-Ukraine izindawo zokuhlala zesikhashana?

Kusukela lapho, i-Airbnb.org iye yahlangabezana nalowo mgomo, ngenxa yosizo oluvela kuBabungazi emhlabeni wonke, abantu abanikela ku-Airbnb.org, nezinhlangano zezenhlalo ezisiza abantu.

Abanye abantu abasabela kuleso sicelo, njengo-Rafał, ngaBabungazi abangomakad'ebona be-Airbnb abanikeza izindawo zokuhlala ngesaphulelo ku-Airbnb.org kulesi sikhathi sobunzima. Abanye, njengo-Mary, usosayensi wedatha waseMelika ohlala e-Berlin, bebephakathi kwaBabungazi abasha abangu-40,000 abakhetha ukunikeza izindawo zokuhlala zamahhala noma ezinezaphulelo nge-Airbnb.org ezivakashini ezingababaleki.

U-Rafał uthi impi yase-Ukraine yashaqisa wonke umuntu amaziyo e-Poland, kodwa wamangazwa yindlela abangane nomakhelwane bakhe abashesha ngayo ukusiza isixuku sabantu ababebalekela impi. Abantu banikela ukudla esiteshini sesitimela sase-Wroclaw futhi baqoqa izinto eziyisidingo ezazizothunyelwa emngceleni wase-Ukraine.

Waqala ukuhlela umculo nozakwabo, kodwa futhi wayefuna ukuthola indlela esheshayo yokusiza. “Kungenye yezinto ezimbi kunazo zonke ukungabi nendawo yokuhlala, indawo yokulala, indawo ongaphindela kuyo.”

U-Rafał uyaqhubeka efake indlu yakhe ku-Airbnb.org ukuze amukele izivakashi ezifuduke ngenxa yobunzima. Usizile nasekutolikeni kumawebhina e-Airbnb.org ngolimi lwase-Poland.

E-Berlin, eqhele ngamakhilomitha angaba ngu-350 enyakatho-ntshonalanga ye-Wroclaw, u-Mary wayebuka izindaba zokuhlaselwa kwe-Ukraine. Lapho ebona isicelo se-Airbnb.org sokusiza esiku-inthanethi, wafaka ifulethi lakhe mahhala.

Ilungu lezisebenzi ze-Organization for Refuge, Asylum, and Migration (ORAM), enye yezinkampane ezingophathina be-Airbnb.org, lanika usizo. Njengoba abezindaba abaningi bebikile, imizwa emelene ne-LGBTQ+ e-Ukraine nakwamanye amazwe azungezile kuye kwanezela ekuchayekeni kwabantu be-LGBTQ+ abafuduke phakathi nale mpi. Ummeleli we-ORAM wabuza u-Mary ukuthi abantu ababili abangongqingili bangahlala yini endaweni yakhe.

U-Mary wakujabulela ukubungaza izivakashi ze-LGBTQ+. Uthi, “Ngangazi ukuthi ifulethi lami lalizoba yindawo ephephile kubo.”

Ngokushesha ngemva kokuhamba kwezivakashi zokuqala zika-Mary, u-Dima wafika ezohlala amasonto amabili. U-Dima, umlisa ongungqingili oneminyaka engaba ngu-20, wayehlala e-Kyiv ngesikhathi abase-Russia beqala ukuqhumisa idolobha ngamabhomu. Inhlangano yomphakathi okuthiwa yi-Safebow isize u-Dima nekati lakhe, u-Peach, bahamba badlula e-Poland baya e-Berlin. Belapho, i-ORAM yamsiza ukuba athole indawo yokuhlala futhi abhalisele amasevisi ezenhlalo.

Ngemva kohambo olugcwele izithiyo, ukufika efulethini lika-Mary kwamlethela impumuzo u-Dima. Uthi, “Inhliziyo yami yayibuhlungu ngalezo zinsuku zokuqala.” “Angazi nokwazi ukuthi iyiphi ingxenye eyayibalulekile kimi: ukuba sendaweni ephephile noma ukuqonda ubukhulu bosizo engilutholayo.”

U-Mary wayesohambweni engekho edolobheni ngeviki lokuqala lokuhlala kuka-Dima. Lapho ephindela e-Berlin, baba ngamathe nolimi. Bachitha amahora etafuleni lakhe lasekhishini, bedla futhi bephuza ubhiya. Babelokhu bexhumana ngemva kokuthuthela kuka-Dima kwelinye ifulethi.

U-Dima uthi, “Kwangisiza kakhulu ukuba ngiqale ukuphila kwami lapha.”

U-Mary uyaqhubeka eveza indlela okwakulula ngayo ukubungaza. Uthi, “Akukho okuyisimanga ngempela engakwenza.” “Ngathatha ithuba. Mhlawumbe kuncane okwaba yisiphazamiso.”

Uqhathanisa lokho nezindaba izivakashi zakhe ezizixoxile: “Ngiyacabanga ngokubhekana [nezinto] ngikwelinye izwe, engingazikhethelanga ukuya kulo, ngihlukanisiwe nomndeni wami. Lokho kuyaphawuleka. Kuyinto enzima.”

U-Mary wayengalindele ukwenza abangane nezivakashi zakhe, kodwa kwamjabulisa ukubona umphakathi owasunguleka.

Uthi, “Izikhathi eziningi, ngemizamo esiyenzayo, asiyiboni ngempela imiphumela.” “Kodwa ngalokhu, ngangingenza umehluko okungenani ekuphileni komuntu oyedwa.”