Izimfihlo ezivela kuMbungazi Ovelele ongumakad'ebona

U-Nikki wayengomunye wababungazi bokuqala ku-Airbnb owathola isimo sokuba uMbungazi Ovelele lapho lolu hlelo luqala ngo-2014. Uye wasilondoloza leso simo amakwata alandelanayo angaphezu kwangu-16.

U-Nikki wenza kanjani? Wafunda ukuyiqala phansi indawo ayibungazayo, kusukela endlwaneni esegcekeni elingemuva kwendlu yakhe e-San Francisco. Leyo ndlu eyodwa yenza kahle kakhulu waze waba nogqozi lokuqashisa ngendlu yakhe yamakamelo amathathu lapho umndeni uvakashile.

Lapha, u-Nikki wabelana ngezimfihlo zokuphumelela kwakhe njengoMbungazi Ovelele.

“Eminyakeni eyisithupha edlule, ngahlala ku-Airbnb yami yokuqala e-Provence, e-France, futhi ngakujabulela. Kwakuyindlu encanyana edolobheni elidala lase-Aix. Yazifeza kahle kakhulu izidingo zethu, kodwa ababungazi babengazange benze okuningi ekuyihlobiseni noma okunjengalokho. Ngaphawula ukuthi uma ngisebenzisa imali kuyo, ngingenza okuthile okukhetheke ngempela ngekhaya lezivakashi elincane elingamafidi-skwele angu-200 egcekeni lami elingemuva. Ngangicabanga ukuthi ngeke libhukhwe kakhulu, kodwa ngamangala lapho libhukhwa masinyane iviki lonke.”

“Isikhathi ngasinye lapho ngifaka indlu entsha ku-inthanethi, ngiqala ngenani lokuqala lendlu elingu-50–70% kuphela wesilinganiso sasemakethe, ngize ngithole okungenani ukuphawula okuthathu (noma ngize ngithole izicelo eziningi zokubhukha ukuze ngikhuphule inani libe sezilinganisweni zasemakethe). Ngenza lokhu ukuze ngilungise izingqinamba ngaphandle kokulahlekelwa ukuphawula okuhle, nangenxa yokuthi kubalulekile ukuthola ukuphawula okuningana masinyane ukuze indlu ibonakale iphezulu lapho kuseshwa.”

“Konke kuqala ngendawo ekahle. Kufanele ihlanzeke. Ngithanda ukuthi izindawo zami zivuleke futhi zingene umoya. Zicocekile, kodwa zinemihlobiso enikeza izindawo ongazibuka. Kufanele futhi zithokomale, ikakhulukazi imibhede. Ngithenga omatilasi be-memory foam, futhi abantu bayabathanda. Kudinga ukuba usiqonde isimo. Uhamba endlini futhi ucabange indlela abantu abazoyisebenzisa ngayo, bese uyilungisa ngokuvumelana nalokho okucabangayo.”

“Ukuba nezithombe ezinhle kwenza umehluko. Kumelwe uthole izithombe zobungcweti. Ngicabanga ngalokho indawo eyikho, kungaba indawo yomndeni noma ezofanela uhlobo oluthile lwesivakashi, bese ngibhala lokho esihlokweni. Bhala incazelo enhle kakhulu eningiliziwe nekhangayo, ukuze uhehele othile kuleyo ndlu. Chaza imibhede, amashidi, amagama amabhrendi ezinhlobo ezithile zensipho noma izinto ezidingekayo ozinikezayo.”

“Endlini yakho, qinisekisa ukuthi ufaka izincazelo zezici zendlu yakho. Zichaze ngokwethembeka nangokucacile, ngaphandle kokuba isicefe. Ufuna ukunikeza incazelo ecace ngokwanele ezosiza izivakashi zakho zikhethe indlu eziyifunayo.”

“Kimina, ukukhulumisana kungumthetho wokuqala wokubungaza okuhle. Ukukhulumisana ngokuqondile nesivakashi kuqala ngesicelo sokuqala. Ngiyababuza njalo labo abangaba izivakashi imibuzo embalwa yokulandelela ngemva kwesicelo ngasinye sokubhukha, ngaphandle kokuba isicefe noma ukuzigaxa ezindabeni zabo, kodwa ukuqiniseka nje ukuthi indlu ibalungele. Usuke usuqala inqubo yokuthola ukuphawula kwezinkanyezi ezingu-5 ngaleso sikhathi.”

“Okungimangaza kakhulu indlela izivakashi eziye zaba nobuntu obuhle ngayo. Abantu baye bathembeka futhi baba nomusa nokuqonda. Futhi ngokuqondene nemali, kwangimangaza ukuthola iholo engangilithola. Ngangingalindele ukwenza kahle kangaka ngesikhathi ngiqala ukubungaza, ingasaphathwa eyokuthi kube umsebenzi engiwenzayo. Ngiye ngagxila ezintweni engizithanda ngempela ngokubungaza futhi ngasebenzisa amathuba uma ngiwabona, futhi kuye kwaphumelela.”